Wednesday, November 15, 2006

今時今日咁既服務態度已經唔得架喇!

長受腰患所困,今日去左光顧一家整骨治療中心。

坐係度等嘅時候已經心知不妙,因為隔住布簾,聽到幾個男女整骨師傅係度興高采烈咁大談股票。

果然,招呼我個位師傅,都只係係咁咦問下我邊度痛,莫講話「望、聞、問、切」。整到一半,佢電話響,就一路講電話,一路捏我條腰,後來仲走左去。等左好一陣,終於係另外兩位師傅同我「執手尾」。而佢地一路同我整,仲一路不時繼續佢地嘅股票話題。

我唔敢話佢地無盡力醫我。可能人地真係技術高超,而且習慣一心二用都不受影響呢。不過已經無關係勒。因為佢地嘅工作態度,根本無辦法比到人信心。我已經決定唔會再去覆診,佢隻手識放激光都係咁話啦。

唔係話下下都要人扮晒專業。
但係做得個行,唔該有番個行既應有態度啦。
尤其係行醫。話晒,人地係將個身體交係你手上架。

p.s.雖然整骨師傅不同賣菜阿婆,但係今日聽佢地個種熱烈氣氛同埋「專家」口吻……各位玩股票既朋友,小心喇……

9 comments:

Anonymous said...

Need referral for Physio my friend?

烏子虛 said...

喬大哥,你先前點樣整親嫁?如果你唔嫌遠的話,我可介紹個師父俾你;不過人家在柴灣,但地鐵很快就到。

烏子虛 said...

後補留言:師父教導(她還很慎重地教),對客要以心對待,除得到客人的信任,也是金錢來源的重要因素。我是美容師,有時也聽到一些客人同我講有的美容師還會一邊替客人做針清(用黑頭針刺穿暗瘡或油脂以作清潔之用)一邊同男朋友不停講電話呢!

M-2 said...

話說一年前,我爛左面,家母帶我去美容院整。
當美容師姨姨幫我做「針清」,個種錐心既痛楚令我莫名亢奮,美容師姨姨亦大喊痛快!
係呢個時候,佢大叫左一聲「哎呀!」,之後旁邊食花生睇戲既媽媽怪叫「d血噴到你眼呀!快d去洗啦!」
點知佢答:「唔使!最緊要止左血先!」
太~~~~~勇敢喇!簡直係救世者!
呢d先係正確既服務態度!
p.s. 好彩我冇病,如果唔係我就做左千古罪人!

喬靖夫 said...

Thank you everybody,我決定都係去睇個正式脊醫,check清楚d……有需要再問各位既推介。

其實依家都唔係好嚴重,跑得跳得,不過比較容易酸痛,特別運動後……同埋令我仲未敢去學巴西柔術……

喬靖夫 said...

Bro Mark:
哈哈,終於「巢」到上黎啦?係咪黑太子比你架?
記得唔好係「山」度爆我真身呀,唔係第時我係個度鬧人鬧得唔過癮架……:D

仲爭你一個飲野吹水既承諾久未兌現。上次見到黑太子提起,有d慚愧……

Anonymous said...

Actually read it for a while la, before you finished 殺禪 :) Just too foolish to realize you can post a comment without a blogger account LOL.

I wont say that on the forum :)

Do contact me should you need physiotherapist...and yes, we have to come out for that drink sooner or later!

烏子虛 said...

喬大哥,看你寫的情況似乎是肌肉勞損;不過這是憑我個人經驗得出的結論。最好找個醫生check清楚才好....各位男士切記啊!腰痛可大可小:D

Anonymous said...

都聽你講左腰痛好耐...一定要正正式式搵脊醫睇好佢,唔係咩都玩唔倒呀~
仲有大把日子玩架嘛~!!!